Vulesse correrte appriesso....

Vulesse correrte appriesso...

Vulesse correrte appriesso,

ma cu ‘a forza ca tengo

‘o pozzo fa sulo

si m’appengo

‘e pettele toie.

Cu ‘a foia ca tiene

e cu ‘e gioie ca daie

ca maie te lamiente

currenne cchiù forte d’’o viento

vulesse sapè ‘a forza addo ‘a piglie

comme ‘e mamme p’’e figlie

e chi t’ha ‘mbarata

pure si vaie controviento

ca t’astregana sempe cchiù forte

e a muorze te vulesse mangià.

Quanno te guardo

me meraviglio

e nun saccio che freva me piglia,

comme a frate, nu pate,

nu ‘nnammurato

comme amico

stanno attiento a chello ca dico,

a chello ca faccio.

E perdere ‘a faccia ‘un è cosa,

ma vulesse correrte appriesso

pe senti a che pienze, che dice.

E aspettrate ‘un è ccosa

ca nun saccio che dì a chi passa

ca me guarda o me spia

cu nu certo riguardo.

Gioacchino Ruocco

Ostia Lido           27.09.019